Svizra - Maurer vesa la Svizra sco «scolar exemplaric»
La Svizra ha tenor il cusseglier federal Ueli Maurer pudì sa preschentar sco «scolar exemplaric» a la dieta da la banca mundiala e dal Fond monetar internaziunal IWF a Washington. La lavur da la Svizra en il rom da las duas instituziuns vegnia appreziada fitg.
Cun ses frain da debits possia la Svizra servir sco exempel per auters stadis, ha ditg il minister da finanzas Ueli Maurer. Ina clera politica da budget naziunala saja la basa per il svilup economic. Maurer è sa participà per l'emprima gia a quest inscunter. Da la partida è er stà il president da la banca naziunala svizra Thomas Jordan.
