Enfin uss dastgava RTR publitgar artichels online senza in connex cun ina emissiun da radio u televisiun, be sche quels avevan pli pauc che 1000 segns. A partir dal mars da quest onn scroda uss quella regla. Quai ha decis il Cussegl federal la mesemna. La nova regla che vala be per la purschida online da la SSR en rumantsch duai rinforzar las medias rumantschas a lunga vista.
Per garantir il schurnalissem rumantsch han las medias privatas grischunas e la SSR elavurà cuminaivlamain il project «Medias Rumantschas». En il rom d’ina collavuraziun vegnan barattads gratuitamain cuntegns. Tranter auter vegn la Radiotelevisiun Svizra Rumantscha (RTR) a metter a disposiziun a las medias stampadas grischunas novitads online actualas en rumantsch grischun. Viceversa surpiglia RTR er texts da las medias privatas. Per quests motivs èsi necessari d’annullar la limitaziun dal dumber da segns.
RTR novitads 11:00