Siglir tar il cuntegn
Inhalt

Svizra Medias svizras en spirala negativa

Las medias svizras hajan in’auta qualitad ma la situaziun da la concentraziun da medias saja alarmanta. A quella conclusiun vegn il rapport annual da la qualitad da medias da l’universitad da Turitg, ch'è vegnì publitgà il glindesdi.

Medias svizras cun auta qualitad - dentant è quella sa diminuida.
Legenda: Dad auta qualitad – anc: La qualitad da las medias svizras sa diminuescha. Keystone

Tras la concentraziun daja en Svizra marcantamain pli paucas medias: Uschè domineschan en Svizra tudestga ils trais pli gronds furniturs 80% da la pressa, en la Romandie èn quai 90% ed en la Svizra taliana 61% .

Las concentraziuns da redacziuns hajan consequenzas tar la rapportaziun davart la politica naziunala ed internaziunala, l’economia e la cultura, concluda il rapport.

Ils victurs èn ils concerns internaziunals

Las medias svizras perdan terren a favur da firmas sco Facebook u Google. En pli datti in ferm trend vers las medias socialas: 50% dals dumandads consumeschan regularmain infurmaziuns via medias socialas.

Pli paucs raps = pli pauca qualitad

La qualitad da las medias d’infurmaziun svizras saja ota – anc. Ella sa diminueschia dentant perquai ch'ils raps mancan e perquai ch'il persunal vegnia reducì, concluda il rapport.

Dapi il 2011 saja sa sminuida la cifra da schurnalistas e da schurnalists dad online e pressa per 19% – en cifras èn quai var 3'000 plazzas. Per la democrazia saja quai in svilup problematic, di il rapport.

RR actualitad 12:20