L'agentura da novitads Keystone-SDA vul sa concentrar sin sia fatschenta centrala – il schurnalissem. Las partiziuns da manaschi «Public Relations» e «Corporate Production» duajan en consequenza vegnir vendidas. Quai ha communitgà l'interpresa svizra. Grazia a questa midada da strategia duai era dar dapli daners da promoziun dal stadi per l'agentura da novitads naziunala.
Fasa da restructuraziun
L'agentura saja sco tut las interpresas da medias amez ina gronda restructuraziun; quella saja vegnida rinforzada tras la crisa da corona. Mez avrigl aveva decis il Cussegl federal che Keystone-SDA survegn enstagl da dus maximalmain quatter milliuns francs ad onn.
