Il conflict da lavur tranter l'agentura da novitads svizra SDA e ses persunal è schlià. Sco il secretariat statal per economia SECO communitgescha, sajan las duas partidas sa cunvegnidas ad in plan social ed ina enclegientscha.
Er sche la SDA sa tegna da principi vi da la reducziun da plazzas, retiria la direcziun da l'agentura da novitads las relaschadas dals collavuraturs ch'èn sur 60 onns vegls ed uschia curt avant la pensiun. Els survegnan en pli la garanzia ch'els na vegnan betg relaschads ord motivs economics ubain da structura fin ch'els han cuntanschì la vegliadetgna regulara da pensiun.
Chauma vegn terminada
Ultra da quai survegnan collavuraturs ch'èn vegnids relaschads u han survegnì in nov contract cun ina reducziun dal pensum, prestaziuns finanzialas supplementaras. Persuenter vegn la chauma ch'era fin uss mo sistida terminada definitivamain.
Il conflict aveva cumenzà il schaner, suenter che la direcziun da la SDA aveva annunzià da reducir 36 plazzas – quai ch'è in quart da tut ils impiegads.
RR novitads 17:00