Siglir tar il cuntegn

Header

audio
Mezdi: Berna – Medis crititgeschan Tarmed
Or da Actualitad dals 20.06.2017.
laschar ir. Durada: 2 minutas 52 Secundas.
cuntegn

Svizra Medis crititgeschan Alain Berset

I saja in'intervenziun massiva ed in'intervenziun che fa donn al tractament ambulant uschia la federaziun da las doctoressas ed ils docters (FMH). La proposta dal cusseglier federal Alain Berset, da spargnar sin custs dal tractament ambulant na giaja betg.

Tge è Tarmed

Avrir la box Serrar la box

Il bler da quai che medis, praticas ed ospitals fan, vegn quintà giu tras Tarmed. Tarmed è pia la tariffa per medis. Tarmed regla quant ch'in medi po pretender per studegiar actas, per pigliar sang, l'operaziun vid l'egl euv. Ins po dir: Tarmed regla quant che medis fadigian e pazients e cassas ston pajar.

Il cusseglier federal Alain Berset prevesa da pauschalisar il tractament ambulant e limitar quel era da temp. Dentant na possia betg tut vegnir generalisà cun pauschalas, causa che mintga tractament ambulant è auter. Per exempel po ina simpla operaziun segir vegnir pauschalisada di Jürg Schlup, president dal FMH. Dentant na possian ins betg pauschalisar la tgira da glieud dementa, perquai che mintgin dovra in auter temp da tgira. I sajan era ils dements, ils uffants ed ils pazients cun problems psichics che pateschian il pli fitg.

Las tariffas da medis vegnan regladas en l'uschenumnà Tarmed. Quel vala en blers cas sco antiquà. Uschia datti per exempel operaziuns ch'èn vegnidas pli simplas, ma che vegnan indemnisadas vinavant tenor la tariffa veglia. En il focus stattan las prestaziuns sco per exempel la radiologia, la medischina dals egls, la dermatologia ed era la medischina da culiez, nas ed ureglias. Ma il president da l'FMH Jürg Schlup di, era sch'ils apparats èn vegnids pli bunmartgads e moderns stoppian ins era savair ir enturn cun quels uschia ch'ils custs da persunal vegnan pli auts.

Spetgar ed analisar

Era sche la FMH crititgescha la proposta da sbassar las tariffas èn era els da l'avis ch'i dovra en mintga cas ina revisiun dal TARMED.

Tenor FMH fissi anc da spetgar, da far sco emprim ina analisa cumpletta da la situaziun e lura agir. Tenor Schlup èn las organisaziuns pertutgadas, la FMH, las cassas da malsauns ed ils ospitals londervi da chattar soluziuns. Proxima stad duess esser la proposta sin maisa. Dentant han las trais organisaziuns adina puspè empruvà da tschertgar soluziuns ensemen ma ellas n'èn betg vegnidas perina. Perquai ha Berset intervegnì cun sia proposta.

RR actualitad 12:00

Artitgels legids il pli savens