Il pli bler gudognan en media ils neuro-chirurgs cun radund 818’000 francs ed ils oncologs pon gudagnar fin 600’000 francs. Il pli pauc gudognan medis spezialists che lavuran en la psichiatria d’uffants e giuvenils. Lur paja munta en media a bundant 180’000 francs. Tenor il studi gudognan en Svizra 118 medis e medias passa in milliun francs ad onn, i pudess dentant er esser anc dapli. Tenor l'uffizi vegnan las pajas numnadamain plitost calculadas pli bass che pli aut.
Immensa differenza tranter medis e medias
Il studi da l'Uffizi federal da sanadad sa basa sin las entradas suttamessas a l'AVS dals onns 2009 fin il 2014. Da vesair è er che las medias spezialistas gudognan sistematicamain damain che lur collegas masculins. La differenza da la paja è 29%. Tenor ils auturs dal studi sa mussa la differenza er sch'ins resguarda l'experientscha professiunala u il sectur spezial. Quai saja surprendent e per part er grev da chapir, ha ditg il vicedirectur da l'uffizi, Stefan Spycher. El veglia uss prender sut la marella la differenza da pajas.
FMH crititgescha il studi
La Federaziun dals medis svizzers FMH crititgescha il studi e pretenda ina discussiun gista enstagl da guardar a moda selectiva sin intgins cas extrems. Las entradas realas dals medis spezialists en Svizra muntia a radund 190'000 francs scriva la FMH. Il studi na resguardia betg radund in quart dals medis, per exempel ils 10’000 medis assistents che gudognan stgars 100’000 francs ad onn.
Tar ils «gronds gudagnaders» sco ils neuro-chirurgs sa tractia be da 0,5% da tut ils medis. Plinavant sajan las cifras dal 2014, pia avant ch’il Cussegl federal haja reducì las tariffas.
RR novitads 12:00+