- Medis e medias sa dostan cunter schlettas valitaziuns en l'internet che vegnan savens fatgas anonim.
- Il protectur da datas da la Confederaziun duai perquai discurrer cun Google davart ratings da medis.
- Quel pretenda ch'ins sto en futur s'identifitgar per valitar in medi.
Valitaziuns per il pli malgistas
Prest adina sajan las valitaziuns da medis online che cumparan da nov sin Google malgistas. Savens sajan las raschuns per valitaziuns negativas il giudicament dal medi pertutgant l'abilitad da lavurar, l'abilitad da charrar cun l'auto u il dretg per ina renta, ha ditg il medi Otmar Meienberg ad SRF. Savens vegnian las recensiuns da pazients cun problems psichics ch'ils medis na sajan gnanc pertscherts.
I dat gia oz pazients che smanatschan als medis cun recensiuns negativas sin google.
Ratings vegnan anc a s'augmentar
Yvonne Gilli da l'Uniun da medis FMH di er che las valitaziuns n'hajan savens da far nagut cun il tractament. Savens sajan las valitaziuns anonimas. Gilli suppona che las valitaziuns vegnan anc a s'augmentar. La FMH ha perquai contactà il protectur da datas da la Confederaziun. Quel vul discurrer cun Google davart ils ratings. In scumond na stettia betg en discussiun, di il protectur da datas. El pretenda dentant che persunas che valiteschan in medi stoppian s'identifitgar en l'avegnir.
RR novitads 08:00