Sco quai che l’universitad scriva, possia il molecul cun il num SIGN-R1 identifitgar differentas versiuns dal virus da grippa ed uschia megliurar la reacziun dal sistem d'immunitad dal carstgaun per che lez po eliminar il virus.
Plirs tschient mortoris pervia grippa
Ils resultads sajan in impurtant pass en il cumbat cunter la grippa ch’è pli privlusa sco quai che blers crajan. En Svizra ston mintg’onn plirs milli carstgauns ir en l’ospital pervia da la grippa e tenor l’Uffizi federal da sanadad moran pliras tschient persunas pervia da cumplicaziuns.
Cumbatter la grippa è sch'ella è gia rutta ora
Sch'il carstgaun è infectà na gida er ina vaccinaziun nagut pli. Il serum sto ultra da quai vegnir creà plirs mais avant l’unda da grippa e n’è perquai betg adina avunda effectiv. Cun medicaments sin basa dal molecul nov duai dentant er esser pussaivel da cumbatter in’infecziun gia rutta ora, quai che saja in grond agid per persunas che na pon betg vegnir vaccinadas.
RR novitads 17:00