Siglir tar il cuntegn

Header

Navigaziun

Legenda: Tadlar il audio Mezdi: Il nov schef da la Posta vul megliurar l'image. Durada 02:06 minutas.
Or da Actualitad dals 03.04.2019.
cuntegn

Svizra Meglierar l'image da la Posta

Roberto Cirillo, il nov schef da la Posta svizra è sa preschentà a la publicitad.

Il Tessinais da 48 onns ha declerà ch'el craja vid ina posta ferma ed autofinanziada. I saja memia baud da preschentar ina strategia, el veglia l'emprim chattar ora tgeinins ch'ils gens da la posta sajan, uschia Cirillo avant las medias. Dapi l'entschatta dal mais è el il nov directur da la Posta.

Il Tessinais succeda a Ulrich Hurni, ch'aveva surpiglià il post ad interim suenter che Susanne Ruoff aveva demissiunà en connex cun il scandal da subvenziuns da l'Auto da posta SA. Cirillo era vegnì elegì il november sco nov CEO.

I'analisa da la correspundenta da la Chasa federala Fabia Caduff

El è in nunenconuschent en Svizra: Roberto Cirillo. Ed ussa ha il nunenconuschent surpiglià in dals concerns ils pli enconuschents da la Svizra: La Posta.

Sia sfida principala, per il mument, è da procurar che la posta gudogna enavos la fiduzia da la populaziun. Quai suenter las cugliunarias tar l'Auto da Posta SA. 78 milliuns francs gudogn or dal traffic subvenziunà èn vegnids zuppads. Ils raps ha la posta entant pajà enavos – però per reparar il donn ch'i ha dà enturn il num da la Posta n'haja anc betg tanschì.

Las turbulenzas ch'i ha dà en etascha da schefs han era procurà per malsegirezzas tar collavuraturas e collavuraturs. Era tar impiegadas ed impiegads sto Roberto Cirillo, respectiv il concern mellen, gudagnar enavos la fidanza.

E fidanza sto il tessinais da 48 onns era gudagnar per sia persuna, cun quai ch'el è nunenconuschent en Svizra. Sia carriera ha el fatg en l’exteriur en il sectur privat ed ussa ha el fatg il pass en il service public, tar in concern che sto surmuntar ina crisa e qua spetga el blera lavur sut l'egliada da la publicitad.

RR novitads 12:00