I saja da procurar per proceduras da natiralisaziun pli gistas. E quellas duain dar a tuts e tuttas las medemas schanzas ed evitar discriminaziun. Quai pretenda l'Observatori svizzer dal dretg d'asil e dals esters. I dovria in dretg da burgais modern e las pretensiuns formalas sajan da sbassar.
Sch'ins cumpareglia la Svizra cun ils auters pajais europeics, haja ella ina da las proceduras las pli severas. Ed in quart da la populaziun svizra n'haja nagin pass svizzer e uschia betg ils medems dretgs sco ils burgais scriva l'Observatori svizzer dal dretg d'asil e dals esters.
Naginas votaziuns a radunanzas communalas
Per garantir il stadi da dretg duain discurs per la natiralisaziun vegnir manads da gremis dal fatg e protocollads sin stgalim communal. Votaziuns davart natiralisaziuns a radunanzas communalas duain vegnir abolidas. Plinavant stoppia il process vegnir scursanì. Plinavant blesseschia la Svizra er a sias obligaziuns dal dretg internaziunal.
