Siglir tar il cuntegn
cuntegn

Svizra Memia pauc giuvens en l'industria tecnica

A l’industria svizra manca la generaziun giuvna. 100’000 collavuraturs da professiun tecnica vegnan pensiunads ils proxims 5 onns. Sulettamain in quart da quellas persunas sa vegnir remplazzà cun ina persuna giuvna.

Hans Hess, il president da Swissmem.
Legenda: Hans Hess, il president da Swissmem, vesa sfidas, mo era schanzas per l'industria tecnica. Keystone

La raschun principala per la mancanza da persunal giuven en il sectur tecnic saja cunzunt la demografia, ha ditg Hans Hess, il president da Swissmem en in’intervista cun la “Schweiz am Sonntag”. Swissmem è l’Uniun svizra per l’industria da maschinas, d’electro e da metal. Annadas cun bleras naschientschas stettian avant la pensiun, ed annadas cun paucas naschientschas suondian.

Gulivaziun è difficila

Malgrà che las fatschentas da l’industria fetschian bler per far pli attractiv las clamadas tecnicas, na tanschia perfin ina creschientscha da 20% lunschora betg per cumpensar la mancanza ils proxims 10 onns.

Lavurar fin 70 onns

Ina pussaivladad per gulivar la mancanza possia la lavur a temp parzial esser. Tenor Hess sajan bleras persunas prontas da reducir lur pensum en la vegliadetgna e percunter lavurar fin 70 onns. Las Interpresas stoppian promover tals models novs.

Spezialists da l’exteriur

Dentant saja l’industria da maschinas, d’electro e da metal era dependenta da spezialists da l’exteriur. Hess ha ditg ch’i dovria radund 5’000 novs collavuraturs per onn. Perquai restia la libra circulaziun da persunas cun la UE era vinavant impurtanta.

RR novitads 12:00