L’onn passà avevan 8,5% da la populaziun svizra sur 16 onns memia paucs daners per ir in’emna en vacanzas. Quai mussa ina stima da l’uffizi europeic da statistica Eurostat. Quai èn in zic pli pauc che l'onn 2017. En cumparaziun europeica è la Svizra però sin il segund meglier plaz. Be en Norvegia è la quota cun 6,4% anc pli bassa. La Svizra e la Norvegia tutgan dentant betg tar l'Uniun europeica mabain tar l'Associaziun europeica da commerzi liber (EFTA).
Populaziun da la Svezia è privilegiada
En l’entira UE n’han 28,3% da la glieud betg avunda daners per far in'emna vacanzas. Avant 5 onns eran quai anc stgars 40%. Ils Svedais èn ils pli privilegiads da l'Uniun europeica. Be 9,7% da la populaziun n'ha betg daners per far vacanzas.
Dals 28 stadis commembers da l'UE èsi per la populaziun da la Rumenia cun 58,9% il pli pauc pussaivel d'ir en vacanzas. Dentant era en Croazia, en Grezia ed en Cipra sto almain mintga segund restar a chasa.
RR novitads 11:00