Siglir tar il cuntegn

Header

Tabla da tempo 30.
Legenda: Turitg vul proteger ses abitants da canera da traffic e reducescha perquai la limita da tempo sin las bleras vias. Keystone
cuntegn

Mesira cunter la canera Tempo 30 sin las bleras vias da la citad da Turitg

Sin bunamain tut las vias da la citad da Turitg duai en futur valair tempo 30. Cun quella mesira duai la populaziun vegnir protegida da memia blera canera da traffic, scriva il Cussegl da la citad en ina communicaziun.

Sin las vias da Turitg duai valair en futur la limita da tempo da 30 kilometers per ura. Profitar da quella mesira duain 105'000 abitantas ed abitants da la citad ch'èn oz exposts a memia blera canera dal traffic.

Gia il 2012 e 2013 ha la citad da Turitg introducì tempo 30 sin diversas vias. Da quellas mesiras han 35'000 abitants ed abitantas profità. Fin ch'i vegn lura er propi pli quiet sin las autras vias, pudessi anc ir in temp. Il Cussegl da la citad quinta da cuntanscher sia finamira fin l'onn 2030.

Mesiras accumpagnantas

Da nov duai er vegnì introducì tempo 30 sin vias, nua che bus curseschan. Ils effects negativs da quella mesira, sco per exempel pli lungs temps da viadi, vul il Cussegl da la citad mitigiar cun mesiras accumpagnantas. Uschia duai dar signals da traffic, agens trassés per ils bus da lingia, fermadas gist sin il vial u che precedenzas da dretga vegnan evitadas. Nua che talas mesiras na tanschan betg, vul il Cussegl da la citad impunder bus supplementars. Quai vegn lura dentant a custar dapli.

Il Cussegl da la citad accentuescha en sia communicaziun, ch'i vegnia però er a dar excepziuns da quella regla. Sin trajects, nua ch'ils abitants e las abitantas na vegnan actualmain betg disturbads da la canera duai uschia vinavant valair tempo 50.

RTR novitads 17:00

Artitgels legids il pli savens

Scrollar a sanestra Scrollar a dretga