Las mesiras da corona sajan d'abolir immediat. Da quest avis è in'allianza da federaziuns interprofessiunalas e da represchentantas e represchentants da partidas burgaisas. Ulteriuras mesiras na sajan ni commensuradas ni adattadas per influenzar la situaziun en ils ospitals u il svilup epidemiologic positiv. Uschia na possian ins betg pli responsar las mesiras actualas vers la societ e l'economia. Ussa saja quai da turnar tar la normalitad, hai gì num da la vart da las organisaziuns da branscha e las partidas burgaisas. I saja bain da proteger las persunas vulnerablas – per il rest da la societad duai però valair la libertad.
Schliar la Task Force e stritgar il certificat
D'ina conferenza da medias a Berna èn stads preschents l'Uniun d'artisanadi e mastergn, sco era represchentantas e represchentants da la PLD, PPS, Allianza dal Center, da l'uniun da centers da fitness e da sanadad, da Gastrosuisse e d'exposiziuns ed events. Pretendì hani era da schliar la Task Force Federala, perquai che lezza derasia plitost temas.
Era il certificat è sin la glista naira da las federaziuns e partidas. Quel na gidia nagut cunter novas infecziuns. Anzi, ins s'infecteschia cun u senza certificat. Perquai pretenda Gastrosuisse dad abolir l'obligatori da certificat en la branscha da gastronomia, cultura, temp liber, sport e da divertiment. Il certificat duai valair mo anc per viadis internaziunals e per tscherts eveniments gronds.
Il Cussegl federal vul decider ils 2 da favrer
Ils 2 da favrer vul il Cussegl federal discutar davart eventualas schluccadas. Anc ils 19 da schaner aveva il Cussegl federal prolungà, las reglas da quarantina e homeoffice fin la fin dal favrer, e las ulteriuras mesiras fin la fin dal mars.