Ils chantuns da la Svizra franzosa na zuppan betg lur malcuntentientscha cun il Cussegl federal e las novas mesiras cunter il coronavirus. L'annunzia dal Cussegl federal haja irrità las regenzas, ha declerà il minister d'economia dal giura, Jacques Gerber en il parlament chantunal.
Declaraziun dals chantuns è en lavur
Las annunzias dal Cussegl federal dal mardi saira, sajan stadas ina surpraisa ed er tut las ulteriuras regenzas dals chantuns da la Svizra franzosa sajan irritadas, ha ditg Gerber vinavant. In document da posiziun da tuttas regenzas chantunalas dal vest saja en lavur. In punct da critica è surtut er ch'il Cussegl federal saja sa drizzà a las medias avant la consultaziun.
Per il cusseglier da stadi dal Vallais, Christophe Darbellay, èn las annunzias dal Cussegl federal incoerentas. El saja surprais da la tenuta radicala dal Cussegl federal e la regenza vallesana vegnia a reagir sin questa consultaziun, ha Darbellay ditg envers la gasetta «Le Nouvelliste».
