Il Cussegl federal metta sin maisa sias propostas per spargnar milliardas a partir dal 2025. Uschia duai dar sur plirs onns damain daners federals per l'assicuranza cunter la dischoccupaziun. Sche la dischoccupaziun creschiss fitg durant quest temp, prevesa il Cussegl federal ina mesira speziala.
Era per l'infrastructura da viafier duai star a disposiziun damain. Durant ina perioda da trais onns prevesa il Cussegl federal da scursanir ils daners per almain 150 milliuns francs ad onn. Quai è pussaivel da realisar senza ch'ins sto adattar la lescha.
In'ulteriura proposta dal Cussegl federal è da sbassar la part dals chantuns vi da la taglia federala directa. Questa proposta stat en connex cun in'idea pendenta en il parlament, da finanziar canortas cun daners federals davent dal 2025. Quai custass a la Confederaziun fin ad 800 milliuns francs ad onn.
Ulteriurs pachets da spargn spetgan
Il Cussegl federal quinta da preschentar il zercladur il sboz da consultaziun per las mesiras da spargn. Mesiras tar l'assicuranza per vegls e survivents AVS, cunzunt la part da las rentas per vaivas – vul il Cussegl federal tractar en in project separà. Quel duai distgargiar la cassa federala a partir dal 2026, scriva il Cussegl federal. Las mesiras concretas elavura actualmain il departament da l'intern.
Pervi dals svilups tar l'AVS e tar las reducziuns da las premias, sco er pervi dals custs supplementars tar l'armada – quinta il Cussegl federal da stuair preparar il pli tard per l'onn 2025 ulteriuras mesiras da spargn.
