Siglir tar il cuntegn

Header

Da notg avant ina bar.
Legenda: Keystone
cuntegn

Mesiras encunter corona Vallais restrenscha massivamain la vita publica

Il chantun Vallais restrenscha puspè la sortida e la vita publica. Bars, discos, kinos però er musuems, bilbliotecas e centers da fitness vegnan puspè serrads dal tut. Ustarias ston serrar a partir da las 22:00.

Il Vallais è il mument il chantun ch'è pertutgà il pli fitg dal coronavirus. L'augment extrem tar ils cas fetschia gronds quitads, ha ditg il schef da la regenza Christophe Darbellay. I dovria perquai mesiras immediatas e rigurusas per interrumper la dinamica. I na giaja betg auter.

Mesiras valan fin la fin da november

A partir dad immediat èn er scumandadas occurenzas ed activitads publicas cun dapli che diesch persunas. Visitas en ospitals e chasas d'attempads vegnan scumandadas. Per scolas autas ed universitads datti mo pli instrucziun a distanza. Sports da contact sco ballape, balla da basket e sports da cumbat èn scumandads. L'FC Sion ed ils clubs da basket professiunals pon però trenar vinavant.

Las novas mesiras van en vigur a partir da mesanotg e duran ina giada fin ils 30 da november.

Chantuns han ulteriuras cumpetenzas

Durant la conferenza da pressa dal suentermezdi ha il cusseglier federal Alain Berset fatg cler che las cumpetenzas grondas giaschian anc adina tar ils chantuns. Il Cussegl federal spetga da quels ch'els reageschian e piglian mesiras anc pli severas, sche quai è necessari per ils singuls chantuns.

video
Berset: «Nus spetgain ch'ils chantuns fan anc dapli»
Or da News-Clip dals 21.10.2020.
laschar ir

RTR novitads 18:00

Artitgels legids il pli savens

Scrollar a sanestra Scrollar a dretga