Siglir tar il cuntegn

Header

cuntegn

Mesiras pervi da corona PPS pretenda midada da curs da la Confederaziun

Isolaziun da gruppas periclitadas, obligaziun da purtar mascras, regulaziuns severas al cunfin. La PPS pretenda da la Confederaziun da midar sia strategia per cumbatter il coronavirus a partir da mez avrigl. Uschiglio saja il donn economic irreparabel.

Las mesiras ch'il Cussegl federal ha ordinà via dretg d'urgenza, valan anc fin almain ils 19 d'avrigl. Quellas protegian las gruppas che sajan periclitadas dal virus, attestescha la PPS en in document da strategia che la fracziun ha approvà unanimamain. Suenter dovria dentant ina nova via economica e per la sanadad. Uschiglio possia dar dischoccupaziun da massa e ch'interpresas giajan empaglia.

La Svizra stoppia tant pli svelt puspè vegnir ora dal dretg d'urgenza, ha ditg l'anteriur cusseglier federal Christoph Bloher. Ni in'isolaziun che cuntinueschia ni da stritgar puspè las mesiras saja il senn. I dovria la via amez.

Regulaziuns severas al cunfin

La PPS propona che persunas ch'appartegnan a la gruppa da risico, stoppian vegnir isoladas tant sco pussaivel. Er las controllas al cunfin sajan vinavant da far. Persunas or da regiuns ferm pertutgadas ed er persunas che na possian betg cumprovar ch'ellas na sajan betg infectadas na possian betg entrar la Svizra. Svizzers che turnian stoppian ir per in tschert temp en quarantina.

Dasper quai vul la PPS er introducir in obligatori da purtar mascras da protecziun, nua ch'il contact tranter persunas ha lieu. La part da la populaziun che n'è betg periclitada ferm dal virus duai uschia puspè pudair lavurar.

Per tadlar:

RTR novitads 18:00

Artitgels legids il pli savens

Scrollar a sanestra Scrollar a dretga