Il stemprà d’enviern ha buffà cun fermezza d’orcan en la muntogna. Sin il Säntis hajan ins mesirà questa saira spertezzas da vent da 154 kilometers per ura. Quai rapporta SRF Meteo. Er sin il Pilatus hajan ins mesirà 139 kilometers per ura. Er en las valladas vegnia il stemprà pli ferm. Ses maximum cuntanschia el lura questa notg.
En connex cun la naiv nova en cumbinaziun cun ils vents ferms, hai num d'observar la situaziun da lavinas.
En la Bassa han ins mesira dumengia saira vents da fin 95 kilometers per ura a Steckborn TG. Ils ferms vents cuntinueschan era la notg. E glindesdi vegni lura er en las valladas talianas dal Grischun ed il Tessin pli selvadi. Là èn da spetgar bufs da favugn da fin 110 kilometers l'ura.
Las turbulenzas da l'aura che pon cuntinuar fin glindesdi saira, è ina zona da pressiun bassa che sa chatta sur la Scandinavia. Quella influenzescha pli e pli fitg era l'aura en l'Europa Centrala.
Privel da lavinas il mument considerabel
En Grischun ha l'Institut per naiv e lavinas d'auzà il privel da lavinas. Sur tut en il nord dal Grischun è il privel grond, stgalim 4. En il sid dal Grischun è il privel tar il stgalim 3, in privel considerabel.
