Mez e mez al segund trend per votaziuns federalas

Sch'il suveran avess votà ils 9 da favrer davart ils projects federals dals 28 da favrer, lura avess quai dà dus geas e dus nas: gea per in segund tunnel dal Gottard e per l’iniziativa per la lètg e la famiglia - na al repatriament effectiv ed a l’iniziativa «nagina speculaziun cun nutriment».

Il segund trend per las votaziuns: 2 x gea, 2 x na

Il resultat dal segund trend che l'institut gfs.bern ha retschertgà per la SSR SRG sa preschenta cun duas giadas gea e duas giadas na.

Quai mussa, ch’il grad da furmaziun d’opiniun n’è betg stabilisà ferm. Avrir maletg en lightbox.

Legenda da maletgs: 15% èn anc indecis. Quai mussa, ch’il grad da furmaziun d’opiniun n’è betg stabilisà ferm - e quai curt avant las votaziuns. Grafica RTR

Insatge pon ins dentant dir cun segirezza: Ils 28 da favrer vegnan a dir ils votants e las votantas cleramain na a l'iniziativa dal pievel «Nagina speculaziun cun nutriment».

Quai ha communitgà Claude Longchamp (gfs.bern) a maun dals resultats da la segund’enquista «SRG Trend» davart las votaziuns dals 28 da favrer. Tar tschels trais projects n'è la situaziun betg tant clera.

Tar l'iniziativa per il repatriament effectiv èn actualmain las duas partidas dals contrahents e dals adherents da l'iniziativa bunamain medem grondas.

La tendenza per in na è bain creschida. Tuttina n’è la differenza betg avunda gronda per esser decisiva. Avrir maletg en lightbox.

Legenda da maletgs: Piz a cup fin l’ultim di: La tendenza per in na è bain creschida. Tuttina n’è la differenza betg avunda gronda per esser decisiva. Grafica RTR

46% (-5) dals dumandads avessan ditg gea u plitost gea a l'iniziativa dal PPS ils 9 da favrer 2016 (di da referenza da l'enquista). 49% (+7) avessan ditg na u plitost na. 5% (-2) èn anc indecis. Cun questas maioritads è e resta il resultat da l'iniziativa intschert.

Dapi l'ultima enquista, mez schaner, èn s’augmentadas las vuschs per in na (+7) e sa diminuidas las vuschs per in gea (-5). Il trend va plitost vers in na. Decisivas èn qua las vuschs dal center, numnadamain da la PLD e da la PCD. Extraordoinari tar quest cumbat da votaziun è la campagna cunter l'iniziativa, ha ditg Claude Longchamp.

«  Per l'emprima giada dapi la votaziun davart l'EWR han ins pudì constatar in dretg moviment civil. »

Claude Longchamp
gfs.bern

L’avantatg è dentant vegnì marcantamain pli pitschen dapi il schaner. Avrir maletg en lightbox.

Legenda da maletgs: Fin uss maina la vart en favur da l’iniziativa. L’avantatg è dentant vegnì marcantamain pli pitschen dapi il schaner. Grafica RTR

Era tar l'iniziativa per la lètg è la famiglia è la sortida da las votaziuns fitg averta.

Facticamain avessan ditg gea u plitost gea ils 9 da favrer 2016 53% (-14) da las persunas interrogadas. Dapi mez da schaner datti però in cler trend vers in na.

Tar la midada da la lescha federala davart il traffic da transit en la Alps, che tracta la sanaziun dal tunnel da via dal Gottard, èn las schanzas per in gea intactas.

10% dapli votants avessan a l’entschatta da favrer vuschà cunter in segund tunnel dal Gotthard. Avrir maletg en lightbox.

Legenda da maletgs: Trend plitost na: 10% dapli votants avessan a l’entschatta da favrer vuschà cunter in segund tunnel dal Gotthard. Grafica RTR

Sche quai fiss vegnì vuschà l'emna passada, lura avessan ditg gea 56% (-8) dals votants e da las votantas. 39% (+10) avessan ditg segir na u plitost na. 5% (-2) en anc intscherts.

Il trend actual va era qua en direcziun d'in na - ma la maioritad vuschass uss anc per in gea. Il facit da Longchamp er tar quest project: «In gea è bain pussibel, ma betg segir.»

Il studi

La segunda retschertga sin incumbensa da la SSR SRG ha fatg l'institut da perscrutaziun gfs.bern tar 1'167 persunas cun dretg da votar en Svizra.

Las persunas tschernidas represchentativamain han respundì tranter ils 5 e 13 da favrer 2016.
Laschar ir video «Gea per in segund tunnel dal Gotthard»

Gea per in segund tunnel dal Gotthard

1:44 min, Telesguard dals 17.2.2016