Siglir tar il cuntegn

Header

cuntegn

Midar num da partida P(C)D – Duai il «C» svanir?

Igl è il schef persunalmain che ha lantschà la discussiun; Gerhard Pfister, il president da la Partida cristiandemocratica svizra (PCD) vul analisar sch'il «C» en il num da partida duai vegnir stritgà u salvà.

Oriund è la partida vegnida fundada sco opposiziun conservativ-catolica encunter ina maioritad liberala. La partida ch'è vegnida fundada cun l'idea da represchentar ils interess dals catolics, sa definescha oz sco partida che represchenta ils interess «cristians» independentamain da la religiun.

Dentant vegn il «C» en il num che stat per «cristian», mess en dumonda dad ina part da la partida. Reacziuns hajan mussà ch'il «C» è per part in motiv per betg eleger la PCD, di la secretaria generala Gianna Luzio. Il «C» vegnia per part interpretà memia «catolic». La PCD saja averta per mintgina e mintgin cun valurs cristianas.

Jau vi salvar il «C».
Autur: Martin Candinas Cusseglier naziunal PCD / GR

Ch'ins fa in'analisa saja bun di il cusseglier naziunal e commember dal presidi Martin Candinas. El persunalmain salvass dentant il «C». Sche, vesess el plitost dad agiuntar il num cun per exempel «PCD – il center».

audio
Saira: PCD en avegnir senza il «C» – tge din ils Grischuns?
ord Actualitad dals 10.01.2020.
laschar ir. Durada: 4 minutas 43 Secundas.

Franar il culp engiu

La PCD ha ils ultims onns pers fermezza dad elecziun ad elecziun. Entant che la fermezza da partida era il 1995 anc tar 16,8% – è quella crudada sin actualmain 11,4%. La spirala engiu na pareva betg da pudair vegnir franada. Dentant, encunter tuttas spetgas, ha la partida pudì tegnair sia fermezza l'atun passà. Er sche la Partida verda ha surpassà la PCD sco quart ferma partida.

E tuttina ha la PCD gudagnà pussanza en il parlament. La partida vegn danovamain perfin titulada sco la pli pussanta. Cun il gudogn da fermezza da la sanestra en il parlament e la sperdita da la dretga, na cuntanscha ni ina ni l'autra ala ina maioritad senza il center. Vul dir, per avair ina maioritad sto vegnir persvasa la PCD.

Ina refurma che dura

Cura che Gerhard Pfister è arrivà al timun da la PCD l'onn 2016, ha el annunzià ina refurma da la partida. Ina refurma che dura anc adina. Igl è ina refurma che cuntinuescha era suenter las elecziuns.

Per il mument discuteschan ins dus puncts centrals. In profil pli cler per pudair sa posiziunar meglier, e las structuras duain vegnir pli professiunalas. Ma oravant tut pli dinamicas: Ozendi va tut pli svelt, di Gianna Luzio, perquai saja impurtant ch'els hajan structuras dinamicas ch'els possian adattar sch'i fa da basegn. E qua duai era vegnir discutà davart il num da la partida. Durant las elecziuns hajan els gì in stretg contact cun la basa e quella haja menziunà en discurs ch'il «C» vegnia mess memia fitg en colliaziun cun religiun, e che quai saja per part in motiv da betg eleger la PCD. Perquai vul la partida analisar la situaziun dal num. Il «C» stat dentant per las valurs cristianas.

Fin tar la radunanza da delegads il zercladur, duai l'analisa esser fatga.

RTR actualitad 17:00

Artitgels legids il pli savens