Siglir tar il cuntegn
cuntegn

Svizra «Migraziun» è e resta il quità central

Tenor la retschertga da gfs.bern per la SSR è il quità principal dals dumandads tut ils temas enturn la migraziun. Pir lunsch enavos suondan las dumondas enturn las relaziuns cun l'Europa e l'ambient. Las schliaziuns per la migraziun haja la PPS e per las dumondas da l'Europa.

grafica cun pitgas
Legenda: Migraziun e tut las dumondas da quest sectur è il quità nummer 1 en Svizra. RTR, C. Gartmann

Il quità central è cun distanza las dumondas enturn la migraziun che 34% numnan sco il quità il pli grond - ed ulteriurs 15% inditgeschan quai sco segund grond quità.

Pli lunsch enavos suondan las dumondas enturn l'Europa e las bilateralas cun 10% ch'inditgeschan sco emprim quità - ulteriurs 8% sco segund.

Cun distanza suonda in bloc cun las tematicas da l'ambient, da la dischoccupaziun e segirtad sociala. Quests temas han mintgamai 5% da las persunas inditgà sco quità central.

La retschertga

Per il barometer d'elecziuns da la SRG SSR ha l'institut gfs.bern interrogà 2'009 persunas cun dretg da votar en Svizra. Quai tranter ils 1 ed ils 12 da zercladur 2015. Il sbagl da prova è tar +/- 2,2%.

«Migraziun» constant - «cassas da malsauns» croda or da «top 5»

Entant ch'ils emprims 3 temas che fatschentan èn restads davant ed en medema successiun, èn ils temas dischoccupaziun e surtut la segirtad sociala s'accentuads en cumparegliaziun cun la retschertga dal mars passà. Las dumondas da las cassas da malsauns na para betg pli da fatschentar uschè fitg la populaziun - ellas èn crudadas ord ils emprims 5 rangs dal barometer da quitads.

Differenzas regiunalas

  • En la Svizra taliana dominescha la dumonda da la dischoccupaziun ils quitads. Cumbinà cun il segund grond quità «migraziun» vesa gfs.bern la raschun surtut tar la tema da la concurrenza per plazzas e pajas en il Tessin.
  • En la Svizra tudestga n'è la dischoccupaziun betg pli tranter ils emprims 5 quitads. Persuenter èn ils quitads là tar la sanadad e las premias da las cassas da malsauns.
  • En la Svizra franzosa èn las dumondas che pertutgan l'ambient betg uschè accentuadas, persuenter giran ils quitads là enturn las dumondas che pertutgan la famiglia. Era qua è la dischoccupaziun anc tranter ils emprims 5.
grafica
Legenda: La PPS ha bain pers in pau confidenza en il sectur da migraziun, ha però anc adina la pli blera confidenza. RTR, C. Gartmann

Tgi che schlia meglier tgenins problems

Tar las cumpetenzas da las partidas vegnan ils quitads centrals attribuids relativ cler ad 1 partida.

  • Tar las dumondas da l'ambient èsi surtut ils Verds ch'han la pli gronda confidenza cun 48%
  • Tar la politica da migraziun han ils dumandads la pli gronda confidenza en la PPS d'anflar las schliaziuns cun 34%.
  • Tar las dumondas enturn l'Europa e las bilateralas è la confidenza dal pievel la pli gronda tar la PLD cun 24%
  • Tar la segirtad sociala crain ils dumandads en la PS cun 23%

La PS la pli cumpetenta per ils top 5

La segunda giada en roda ha la PS la pli gronda confidenza dals dumandads da chattar u manar a schliaziuns ils top 5 quitads; quai gist suandada da la PPS. Tar lezza è però remartgabel che la cumpetenza ch'ils dumandads l'attribueschan è sa reducida suenter la votaziun davart l'iniziativa cunter l'immigraziun da massa. La PPS resta però la partida cun la pli gronda confidenza en dumondas da migraziun.

RR novitads 17:00