Migrena tutga tar las pli frequentas malsognas dal mund. Passa 10% da la populaziun mundiala è pertutgada.
Migrena cun aura
Tar var mintga tschintgavel cas da migrena sa tracti d'ina migrena cun aura. Ils pertutgads e las pertutgadas han tiers la migrena anc sintoms sco dusturbis da la vesida e da la lingua.
Migrena na pon ins betg curar, dentant ins ha ozendi fitg bleras pussaivladads da levgiar ils sintoms – cun medicaments dentant era cun meds alternativs.
Terapia
Durant in'attatga da migrena pon medicaments sco Paracetamol u er Ibuprofen gidar. Sche la migrena è dentant gia memia ferma, n'han quels medicaments nagin grond effect pli.
Dapi intgins onns datti in nov medicament, numnadamain Aimovig. Aimovig è ina squitta d'anticorpuls cun effect profilactic. Cun il medicament ch'ins sa sprizza ina giada al mais, sa sminueschan las attatgas per il solit per la mesadad.
Perquai che la squitta è dentant fitg chara, èn las pretensiuns per survegnir ella detg strictas.
In pazient da mai ha pudì meglierar sia migrena tras malegiar acril – Ins vesa damai, las terapias èn fitg individualas.
Passa 50 onns migrena
Bernadetta Janutin da Savognin ha 66 onns. Ella suffrescha gia dapi sia uffanza da la migrena. Cun ils onns è la malsogna adina vegnida pli ferma. La dunna surmirana ha gia empruvà ora blers medicaments e bleras terapias.
Igl ha dà temps, durant ils quals che jau hai gì 15-20 attatgas da migrena il mais.
Dapi var dus onns utilisescha ella la squitta Aimovig. Cun la squitta èn las attatgas da migrena sa sminuidas fermamain, dentant senta Bernadetta Janutin insaquants effects secundars:
Dapi che jau utilisesch la squitta, hai jau mal las musclas, jau perd chavels e jau sun bler stancla.
Or da l'archiv: