Il detaglist Migros venda la chadaina da Globus per passa ina milliarda francs. Il concern tailandais Central Group ed il concern d'immobiglias austriac Signa daventan en parts egualas ils novs possessurs dal Globus. Quai ha communitgà il concern a Bangkok. En Svizra ha Globus 48 filialas.
En la Germania ha Signa tranter auter cumprà las chadainas da gronds negozis Karstadt e Kaufhof. La gruppa Signa Retail ha radund 45'000 collavuraturs e fa ina svieuta annuala da radund 7,2 milliardas euros. La sparta d'immobiglias da Signa è, tenor atgnas indicaziuns, cun ina valur brutto da 19 milliardas euro in dals investurs d'immobiglias il pli impurtant da l'Europa.
Migros vul investir en commerzi online
Migros aveva la stad passada offrì per la vendita la chadaina Globus sco er la fatschenta da mobiglias Interio cun Gries Deco e Depot ed er il spezialist dad e-bikes M-Way. La raschun per quest pass saja che Migros veglia sa focusar pli ferm sin il commerzi online.
Ord l'archiv da SRF:
Il venderdi passà ha Migros gia communitgà da vulair vender fin la fin da l'onn il center da cumpra Glatt a Wallisellen.