Igl è vinavant pauc probabel, ch’il parlament decida anc en questa sessiun davart la milliarda da coesiun. Il Cussegl dals chantuns na vul numnadamain betg tractar la fatschenta pli baud che planisà. El ha refusà ina proposta davart il proceder cun 30 cunter 14 vuschs.
Uschia na po il Cussegl federal betg pajar tant pli spert ils daners per stadis commembers da l’UE pli paupers. El avess gugent fatg quai sco segn da detensiun en la relaziun cun l’Uniun europeica. Questa milliarda da coesiun è numnadamain la premissa che la Svizra dastgia insumma sa participar al program da perscrutaziun da l’UE «Horizon Europe».
La Chombra pitschna discussiunescha pia pir il segund davos di da la sessiun, ils 30 da settember davart la milliarda da coesiun. Il Cussegl naziunal decida il medem suentermezdi avart la fatschenta. Serrada giu vegn la fatschenta be sch'i na dat naginas differenzas tranter las duas chombras.
