Dapi dus onns vegn facultad senza identitad ch’è pli veglia che 60 onns, publitgada sin la pagina d’internet dormantaccounts.ch. Publitgadas vegnan durant in onn tut las datas da la facultad senza identitad da dapli che 500 francs. Suenter van ils raps en la cassa dal stadi.
102'000 Francs avain nus fin uss survegnì en la cassa dal stadi da la facultad senza identitad. Ma perquai che quai è l'emprim onn nua che nus survegnin insumma raps na savain nus betg far prognosas quants raps che quai pudessan esser fin a la fin da l’onn.
Il 2017 è l'emprim onn ch'il stadi survegn raps. Fin uss en quai 102’000 francs. Dentant pudessan quai esser fin a la fin da l’onn bler dapli raps, perquai che fin uss han mo pitschnas bancas surdà ils daners a la Confederaziun. Qua sa tracti da summas pitschnas. Las bancas grondas n'han anc betg surdà insatge.
I na saja insumma betg en l’interess da las bancas dad avair talas facultads senza identitad, di Sindy Schmiegel da l’Uniun da Bancas Svizras. I schabegia però adina puspè: Firmas serran ed emblidan ch'ellas han in conto, persunas fan midada ed emblidan da communitgar lur nova adressa a la banca, u persunas moran ed ils parents na san betg che quella persuna aveva anc raps tar la banca.
Igl è en l’interess da las bancas da chattar ils possessurs dals daners perquai ch'ella na sa betg sco ir enturn cun facultads senza identitad. Dentant datti quest cas adina puspè.
Las bancas na sappian betg, tge pigliar a mauns cun tals daners. Facultads senza identitad pon esser contos, schecs u tresors. Perquai na san era las bancas betg dir, quants raps che giaschan insumma tar las bancas. I dat mo stimaziuns – per exempel da la firma FASTSearch che tschertga sin incumbensa da las bancas ils possessurs dals contos. Els quintan che passa duas milliardas francs giaschan tar bancas svizras.
Contos che na vulan betg vegnir chattads
Cun agid da las datas publitgadas emprova la firma da chattar ils possessurs dals contos. Per André Naef da la firma FASTSearch n'èsi mintgatant betg cler, daco che las bancas na chattan betg ils clients. Per part dettia quai numnadamain bleras indicaziuns davart ils possessurs. Mintgatant sajan er nums prominents sin la glista.
Mintga facultad senza identitad ha sia atgna istorgia. Nus avain era gia chattà ragischs criminalas.
Dentant datti era il cas ch'ils clients na vulan betg vegnir chattads. André Naef raquinta da cas che clients avevan adina puspè telefonà dad in autra cabina da telefon a la banca. Quels clients saja quai prest impussibel da chattar.
In autra pussaivladad per tschertgar in conto è da telefonar cun Marco Franchetti, il mediatur da las bancas. El communitgescha tranter la banca ed ils clients. Las dumondas vegnan per gronda part da la Germania, da la Frantscha e da l’Italia.
Quest onn avain nus gì dapli dumondas ch'ils onns avant. Quai pervi che las facultads senza identitad sur 60 onns vegnan uss publitgadas. Normalmain avain nus constant 400 fin 500 dumondas ad onn.
Mo 10% da las dumondas sajan legitimas. Marco Franchetti fa adina puspè l’experientscha che persunas emprovan dad engianar e da survegnir access ad in conto ch'els n'han nagin dretg. Dentant saja quai impussibel, perquai ch’ins stoppia per exempel mussar documents che conferman ch’ins saja parent cun il ver possessur. Ed enfin ch'in possessur legitimà è chattà giaschan ils daners vinavant tar las bancas.
RR actualitad 12:00