Plazzas stablas per viagiantas e viagiants datti en Grischun a Ziràn, Cuira e Cazas. En tut èn quai 28 plazzas stablas per las minoritads renconuschidas naziunalmain dals Jenics e Sinti, ma er per ils viagiants Roma. Il rapport da la fundaziun per viagiants – che examinescha mintga tschintg onns la situaziun da las plazzas da fermada en Svizra – mussa dentant, ch'i duvrass 10 plazzas dapli per pudair porscher avunda lieu. Medemamain dettia quai memia paucas plazzas da transit en Grischun sco er en tut la Svizra.
Tenor stimaziun da la fundaziun vivan 2'000 fin 3'000 viagiantas e viagiants en Svizra. Per pudair viver lur tradiziun duvrassi 40 fin 50 plazzas stablas en l'entir pajais. Actualmain datti en Svizra dentant be 16 da quellas plazzas. Il medem purtret sa mussa cun las plazzas da transit. Quai èn plazzas che vegnan abitadas per in temp pli curt. Da quellas datti en tut la Svizra 24, ma atgnamain duvrassi 80 tenor la fundaziun per viagiantas.
