I è schizunt in zic dapli che mintga 20avla persuna en Svizra. Quai resulta da la nova statistica dal servetsch per l'economia CRIF. Questa statistica cumpiglia persunas pertutgadas da stumadira, concurs ed arrest da perdita. La quota da debits saja ultra da quai pli auta en chantuns cun dapli dischoccupads.
Quota in zic pli bassa che l'onn 2015
En pertschient munta la quota da debits a 5,3 %. L'onn passà eran quai anc 5,5 %. Questas cifras ston ins dentant guardar cun precauziun. La populaziun è numnadamain creschida, uschia ch'ins sto resguardar la proporziun. Concret è il dumber da persunas cun debits creschì da 438'233 sin 441'706.
Dapli debiturs en il chantun Neuchâtel
Tranter ils chantuns datti grondas differenzas. En il chantun Neuchâtel vivan ils pli blers debiturs, numnadamain 8,7 % da la populaziun da Neuchâtel. Sin posiziun dus è Basilea-Citad cun 7,3 % e lura suonda il chantun Vad cun 6,9 %.
En il chantun Appenzell Dadens vivan las persunas cun la pli gronda prontadad da pajar lur quints. Mo 1,3 % dals Appenzellais han debits.
RR novitads 12:00