Siglir tar il cuntegn

Svizra Mintga segund fa quitads davart la sfera privata en l'internet

Nov da diesch abitants svizzers dovran l'internet. Ils blers èn da l'avis da vegnir bain a frida cun l'internet. Mintga segund fa dentant quitads per sia sfera privata. Quai resulta dad in studi represchentativ che l'universitad da Turitg ha fatg.

Mauns vid la tastatura dad in laptop.
Legenda: Keystone

Il temp d'utilisaziun da la populaziun Svizra saja sa dublegià dapi il 2011. El muntia ozendi a 25,5 uras ad emna. Il studi attribuescha quai d'ina vart al fatg che l'internet vala sco emprima funtauna per infurmaziuns, da l'autra vart però era che l'internet saja sin il medem nivel sco la televisiun pertutgant ils cuntegns da divertiment.

Dal studi resulta era ch'il public d'internet è daventà pli critic e sceptic ils ultims onns. Entant che 75% indicavan il 2013 da crair almain la mesadad da las purschidas online, èsi ussa anc stà 58%.

En il rom da quest studi represchentativ ha l'universitad da Turitg pudì eruir dus facturs centrals:

  • La vegliadetgna: Pli vegls ch'ils utilisader sajan e pli sceptics ch'els sajan envers l'internet. Radund 360'000 persunas en la Svizra na nizzegian insumma betg l'internet.
  • Il grad da scolaziun: Pli bass ch'il grad da scolaziun saja, e pli ditg ch'ins navigheschia en la rait e pli paucas resalvas ch'ils utilisaders hajan pertutgant la sfera privata.

La sfera privata vala sco tema impurtant per la populaziun che surfescha en l'internet. La mesadad da tuts èn preoccupads che firmas e persunas violeschian la sfera privata online. 80% han indicà da far stim fitg da proteger la sfera privata e 44% crain d'avair la controlla da lur cuntegns en la rait.

RR novitads 11:00

La retschertga

Per la retschertga represchentativa han ils perscrutaders da l'universitad da Turitg dumandà 1'100 persunas sur 14 onns.