Las zonas da privel èn vegnidas evaluadas ed igl è stà pussaivel da valitar ellas uschia che betg l'entira populaziun sto bandunar il vitg. Plinavant pon parts dal vitg er vegnir duvradas vinavant per l'agricultura. Dependent da la distanza dal deposit, han ins definì in perimeter d'indriz, in perimeter da segirezza ed in perimeter d'evacuaziun. Er per la via naziunala, che vegn en avegnir manada tras in tunnel da protecziun, hajan ins chattà ina schliaziun, che s'integreschia en il purtret dal vitg e da la cuntrada. La situaziun dal plazzal per la rumida e l'infrastructura vegnian prendidas ensemen en in lieu cumpact.
Betg tut ils abitants e las abitantas ston bandunar Mitholz
Il model cun las differentas zonas da privel pussibilitescha che betg l'entira populaziun da Mitholz sto bandunar il vitg. Ils process da rumida cun grondas massas da muniziun sa concentreschian sin l'anteriur tunnel dal deposit ed il cugn da la bova. Questa zona è quella d'indriz serrà (cotschen) nua che be persunal cun il dretg d'entrar po esser. En il perimeter da segirezza (mellen), na pon persunas betg star per in pli lung temp. Las persunas ch'abitan en quella zona ston bandunar lur chasas ed ir a star en in lieu segir. En questa zona duai dentant restar pussibel da cultivar l'agricultura. La zona d'evacuaziun (verd) duai restar abitabla. Dentant sto la populaziun en questa zona er esser pertscherta ch'igl è da quintar cun evacuaziuns temporaras e cun ulteriuras restricziuns pervi da las lavurs.
Mitholz daventa plazzal
Las emprimas chasas a Mitholz ston esser bandunadas il 2025. Là vai per pudair bajegiar las construcziuns da protecziun per la viafier e la via. Quellas chasas che ston lura vegnir bandunadas per la rumida dal deposit, ston esser vidas fin il 2030. Dentant ston ils abitants e las abitantas quintar gia durant las lavurs da preparaziuns ch'igl è d'evacuar temporarmain il vitg. Plinavant sto la populaziun quintar cun canera, pulvra e vibraziuns, perquai ch'i dovra plazzals gronds per las lavurs da preparaziun sco er per las lavurs da rumida. Quests impediments reduceschan la qualitad da viver a Mitholz enfin ch'il deposit è rumì. Perquai sustegna la Confederaziun la populaziun sche quella vul tuttina bandunar la zona d'evacuaziun.
Infrastructuras dovran bler plaz
Perquai che la segirezza stat sin plaz numer in, èsi impurtant ch'ils viadis che la muniziun sto far sajan curts. Perquai duai la gronda part da la muniziun vegnir elavurada gia al lieu. Las lavurs da rumida e l'infrastructura per dismetter la muniziun dovran bler plaz, tuttina haja il VBS empruvà da resguardar tant sco pussaivel l'agricultura e da pudair nizzegiar vinavant la surfatscha.
En avegnir nagin privel pli pervi da muniziun
L'explosiun d'ina part dal deposit l'onn 1947, ha repartì parts da muniziun en l'entira vallada. Per raschuns da segirezza vegnan las surfatschas pertutgadas da las lavurs sco emprim controlladas da l'armada svizra, e quella muniziun dismessa a moda segira.
Cun questa rumida vulan las autoritads surpigliar responsabladad e sa metter en per schliar a lunga vista il problem cun la muniziun a Mitholz. Uschia duai l'entira zona pertutgada da l'explosiun d'avant 75 onns vegnir rumida da muniziun e restanzas, per uschia garantir la segirezza e per ch'i na dettia betg pli in privel tras explosiuns spontanas en il vitg.
