Siglir tar il cuntegn
cuntegn

Svizra Mitholz resta lieu da privel

En il magasin da muniziun en il Kandertal ch'è vegnì sutterrà tar in'explosiun il 1947, pudessi dar tenor statistica mintga 300 onns in'explosiun pli pitschna e mintga 3'000 onns ina pli gronda. Quai resorta d'ina nova analisa da risico.

Mitholz. Il grip oz.
Legenda: En il grip eran vegnids deponids 7'000 tonnas muniziun. Il 1947 hai dà in'explosiun ch'ha sutterrà ina gronda part da la muniziun ch'è anc adina là. Keystone

L'anteriur magasin da muniziun a Mitholz en la part sura dal chantun Berna resta in lieu da privel augmentà. Quai conferma il rapport ch’ils experts han fatg per incumbensa dal Departament federal da defensiun e che lez ha preschentà il glindesdi saira als abitants en vischinanza da la chaverna sballunada.
Il nov rapport curregia uschia ils rapports precedents ord ils onns 1949 e 1986. Quels eran vegnì a la conclusiun, ch'i na saja betg da far quint cun privels pli gronds pervi da las var 3'500 tonnas muniziun da l'armada che sa chattan anc oz en l'anteriur magasin da muniziun da l'armada ch'è explodì avant passa 70 onns.

Naginas mesiras urgentas per populaziun

Tenor ils experts è il privel passa 30 giadas pli grond che lubì. Malgrà quai vegn il rapport a la conclusiun ch'i na dovra naginas ulteriuras mesiras urgentas per proteger la populaziun. Quai suenter che l'apoteca da l'armada è vegnida dischlocada questa stad ed il chantunament è vegnì serrà.

A media vista stoppia però il ristg vegnir sbassà. In'ulteriura gruppa d'experts saja vi da elavurar las mesiras, scriva l'armada.

RR novitads 06:00