Ils musicists e las musicistas da l'Engiadina Bassa èn nominads en la categoria Musica populara – quai sper il clarinettist Dani Häusler e l'accordeonist Martin Nauer.
Ils Fränzlis da Tschlin eran «ün pa stuts»
Ils Fränzlis da Tschlin – quai èn actualmain ils frars Domenic e Curdin Janett cun lur figlias Anna Staschia (da Domenic) e Cristina e Madlaina Janett (da Curdin). «Il prüm eschna stats ün pa stuts d’esser gnüts nominats», ha ditg Curdin Janett a l'ANR, «no vaivan il sentimaint chi gnian onurats cul Prix Walo in prüma lingia ils stars dal showbusiness svizzer.»
Er eran in zic surprendì cun vesair, ch'i dettia er ina categoria per musica populara e che lur chapella fetschia part da quella. Els na sajan betg uschia suvent en la televisiun e «quai nun es neir na uschè simpel, illa televisiun es il privel grond chi gnia da quai artificial.»
Sch'els hajan schanzas na sappia Curdin Janett betg dir
«A Dani Häusler ch’eu cugnuosch persunalmaing e chi’d es üna capacità as vezza adüna darcheu illa televisiun, perquai dschessa chi füss bod da suppuoner ch’el survegna il premi.» A Martin Nauer n'enconuschia el betg, raquinta Janett a l'anr, el sappia dentant, che quel saja in enconuschent musicist da la Svizra centrala.
Ils Fränzlis da Tschlin datti dapi radund 35 onns
Al principi dals onns 1980 avevan ils frars Domenic, Duri e Curdin Janett registrà ensemen cun ils musicists Flurin Caviezel e Men Steiner ina platta da grammofon cun intgins tocs da Franz Waser. Quella constellaziun dals Fränzlis è restada enfin che Flurin Caviezel ha bandunà la chapella. El è vegnì rimplazzà da Madlaina Janett.
Avant paucs onns han lura Duri Janett e pauc pli tard er Men Steiner terminà lur carriera da Fränzlis. Per els èn vegnidas Cristina ed Anna Staschia Janett. La furmaziun è instrumentada cun clarinetta, bratscha, gìa, cello e giun.
Proxim project cun Corin Curschellas
«Actualmaing eschna landervia ad elavurar ün program per ün disc cun Corin Curschellas», tradescha Curdin Janett, «ella vaiva fingià avant lönch dit ch’ella fess jent alch cun no, ma lura nu vaivna mai temp, o ella o no d’eiran adüna inclur ingaschats.»
Tar il project cuminaivel sa tractia da chanzuns d’uffants rumantschas: «Il prüm cumpara il disc e davo eir amo il cudesch cun quistas chanzuns in tuot ils idioms rumantschs.»
... vegn surdà la dumengia, ils 13 da mai, per la 44avla giada en 8 categorias: Quellas èn «Pop/Rock », «Newcomer », «Cabaret/Comedy», «Producziuns sin il palc», «Producziuns da films», «Producziuns per la televisiun», «Acturas ed acturs» e la categoria «Musica populara». Il Prix Walo è il premi pli impurtant dal showbiz svizzer. la notg da gala e la surdada dals premis vegn organisada da la Show Szene Schweiz. Il nom ha il premi causa ils merits da Walo Linder, il fundatur e schef da divertiment da Radio Beromünster.
RR novitads 17:00
