Per la partida burgais democrata, la partida d’Eveline Widmer-Schlumpf, vala uss da chattar ina soluziun constructiva e da s’engaschar per in serrar las retschas. Per la PBD munta la demissiun d’Eveline Widmer-Schlumpf uss ina entschatta nova cun posiziuns constructivas. La decisiun da demissiunar deplorescha la partida ma per la PBD saja la decisiun era chapibla. Cun Eveline Widmer-Schlumpf sa retira ina persunalitad impressiunanta cun in mussament da prestaziun extraordinari, scriva la PBD.
El passà eran nus savens sulet la partida d'Eveline Widmer-Schlumpf, uss po la partida sa profilar er senza sia cussegliera federala.
La partida populara svizra vul uss dapli responsabladad
La partida populara svizra vul suenter la demissiun da Eveline Widmer-Schlumpf surpigliar dapli responsabladad. Las ulteriuras partidas stoppian uss mussar ch’ellas sustegnan la concordanza, scriva la PPS. La partida vegnia a preschentar almain in candidat per in segund mandat en il Cussegl federal.
La partida liberaldemocrata ha engrazià Widmer-Schlumpf
La partida liberala Svizra sustegn in segunda sez da la partida populara en il Cussegl federal. In candidat dal center politic na vegnia betg en dumonda, ha ditg il president da la PLD Philipp Müller.
La pli ferma partida en Svizra sto uss vegnir integrada en la regenza.
En ina communicaziun a las medias ha la PLD engrazià a Widmer-Schlumpf per la lavur prestada ed il servetsch per la Svizra.
Cun Eveline Widmer-Schlumpf perda il Cussegl federal ina persunalitad
Per la partida cristiandemocrata perda il Cussegl federal cun Eveline Widmer-Schlumpf ina persunalitad impurtanta che aveva ina excellenta enconuschientscha dals dossiers, scriva la PCD. La demissiun portia dentant uss er ina tscherta clerezza en connex cun las elecziuns per il Cussegl federal. La PCD reconuschi la pretensiun da la parida populara sin in segund sez en il Cussegl federal, uss spetgia la PCD candidats el senn da la concordanza e la collegialitad, scriva la PCD.
La partida socialdemocrata deplorescha la demissiun
Ils socialdemocrats vulan sco successura ni successur da Eveline Widmer-Schlumpf ina persuna che respecta il stadi da dretg. Vinavant pretenda la PS in candidat che respecta la via bilaterala cun l’Uniun europeica, che respecta la convenziun dals dretgs umans e la collegialitad, quai ha ditg il president da la PS Christian Levrat envers l’agentura da novitads sda. Quests elements sajan stringents, scriva la PS.
RR novitads 20:00