Basilic melona
-
Bild 1 von 2. Gusta anc meglier che quai ch'el vesa ora: il Basilic melona. Bildquelle: RTR.
-
Bild 2 von 2. La melona d'aua en cumbinaziun cun menta e basilic dat in gust ch'ins na vegn betg pli d'emblidar. Bildquelle: RTR.
Sco emprim èsi da far il sirup da basilic. Per quel èsi da laschar coier levamain 1 dl aua cun las frastgas dal basilic per circa 8 minutas. Lura vegni dultsch! Viaden cun il zutger, laschar buglir lev, truschar, cular las restanzas dal basilic ed emplenir il sirup en ina pitschna butteglia u magiel. Quest sirup è conservabel enfin duas emnas en la frestgera.
Ussa èsi da tagliar la melona d’aua en tocca per ch’ins possia far suc ordlonder. Il meglier va quai cun in mixer a batgetta u in mixer cun pe. Suenter èsi da cular questa massa enfin ch’ins ha be pli il fin suc da melona.
Lura èsi gia temp per il bitger da maschadar. En il bitger vegnan dus u trais fegls da menta e basilic smatgads per ch'ils ielis ed il suc da l’erva vegnian libers. Latiers èsi da metter il suc da melona, in zichel sirup da basilic ed il suc da citrona (tut tenor quant asch ch’ins ha gugent, gist metter en tut il suc). Dar ina buna scurlada, emplenir en tes magiel cun in zic glatsch e laschar gustar.
Safran fraid
-
Bild 1 von 2. Il star tranter las spezarias è era qua ina classa per sasez. Bildquelle: RTR.
-
Bild 2 von 2. Il Safran fraid è IL refrestg per tut ils gourmets e tut las gourmettas,. Bildquelle: RTR.
Sco emprim èsi da far buglir 0,75 liters aua e lura laschar trair ils satgets dad Earl Grey en là per 8-10 minutas. Lura metter a frestg quest tè.
En il mument ch’il tè vegn fraid pon ins preparar il sirup da safran. Per il sirup èsi da far buglir 1 dl aua cun en ils fils da safran per 10 minutas. Lura agiuntar il zutger e laschar coier vinavant enfin ch’il zutger è sa schlià. Lura emplenir en in magiel u ina butteglia. Il sirup è conservabel enfin duas emnas en la frestgera.
Per il mocktail pon ins ussa maschadar il tè nair cun in zic sirup da safran e suc da citrona. Bain gusta el era sch'ins metta anc en in dagut rum senz'alcohol.
LiNoncello Spritz
-
Bild 1 von 3. Tranteren ston ins dir NON, mon amour. Gusta sco Limoncello – ma non alcoholic. Bildquelle: RTR.
-
Bild 2 von 3. Anc ina bella flura sco decoraziun ... Bildquelle: RTR.
-
Bild 3 von 3. ... ma quai tut suenter ch'ins ha fatg il sirup da citronas. Bildquelle: RTR.
Per il sirup da citronas èsi da cuvrir las paletschas da 4 citronas en in glas da mel cun zutger. Quai pon ins lura laschar restar per minimum in di enfin ch’il zutger sa schlia. Sche quai na schabegia betg dal tut, lura pon ins metter en in dagut aua suenter 24 uras per schliar il rest dal zutger. La massa vegn lura culada enfin ch’ins ha in sirup che savura bunamain pli fitg da citronas che citronas sezzas. Quai è uss noss Linoncello.
Per il mocktail èsi uss da prender circa trais tschaduns gronds da quest sirup e metter en in bitger da maschadar. Per far vegnir in zic pli frestg il drink èsi uss da metter latiers in zic suc da citrona e 2-3 daguts d’aua da rosas. Suenter ch’ins ha dà ina scurlada al bitger vegn la maschaida emplenida e in magiel cun glatsch, ch’ins emplenescha lura si cun aua minerala.
Curtini
Per il sirup èsi da tagliar pitschen dus persics e laschar coier lev quels per 10 minutas en aua. Lura agiuntar il zutger e laschar buglir per 5 minutas. Tgi che vul po anc metter en in dagut colur da vivondas cotschna. Sco proxim èsi da laschar atras il culin la massa e derscher il sirup en ina butteglia. Il sirup è conservabel enfin duas emnas en la frestgera.
Per il mocktail èsi ussa da metter en in cup da maschadar in zic sirup da persics e metter latiers 2-3 daguts d‘aua da flurs d'oranschas. Lura pon ins metter en suc da citrona tenor gust ed emplenir cun aua, aua minerala u schizunt ina aua tonica.