- custs da sanadad
- premias da las cassas da malsauns
Ils pli gronds quitads fan als Svizzers ed a las Svizras ils custs da sanadad che creschan ad in crescher e las premias da las cassas da malsauns. Quai resulta dal monitor da quitads 2024. Tenor il monitor han duas terzas da las persunas dumandadas inditgà quests dus quitads sco ils pli gronds. Differenzas tranter las schlattainas, las regiuns u aifer generaziuns na datti betg. Ils auts custs da sanadad eran gia avant in onn quai ch'aveva fatg ils pli gronds quitads als Svizzers ed a las Svizras.
Sin ils ulteriurs rangs dal monitor da quitads svizzer suondan:
- ils custs d'abitar
- l'inflaziun
- il provediment da la vegliadetgna
- ils pretschs d'energia
Ils tschintg quitads principals da las persunas dumandadas han pia da far cun daners. Pir sin plazza sis suonda il quità davart la protecziun da l'ambient ed alura la midada dal clima. Dus temas che n'hajan betg da far directamain cun l'atgna bursa, uschia ils auturs dal monitor da quitads.
Per il monitor èn vegnidas dumandadas 2'631 persunas en la vegliadetgna da 16 fin 65 onns – quai en Svizra tudestga ed en Svizra romanda. La retschertga ha gì lieu la fin da november.