Avant in onn temeva mintga 5avla persuna cun occupaziun da gudogn per sia plazza da lavur. Uss è quai quasi mintga quart, tenor il monitoring da segirezza da l'Uniun svizra d'assicuranzas.
Da las persunas dumandadas han 25% inditgà ch'ellas vesian in grond ristg da vegnir senza lavur ils proxims 10 onns. Il studi ha era dumandà pervi da la segirezza da l’informatica cun lavurar da chasa anora. Pli vegls ch’ils dumandads èn, e pli gronds che lur quitads èn. Glieud pli giuvna ha dapli confidenza en las tecnologias.
Suenter la pensiun
Trais quarts dals Svizzers e da las Svizras spetgan era rentas pli bassas, uschia ch'ils quitads per il provediment en la vegliadetgna è creschì. E 77% teman che las cassas da pensiun na possian betg porscher la prestaziun quintada, sco l’Uniun svizra d’assicuranzas scriva.
Il monitor da segirezza ha l'institut da retschertga Sotomo fatg il zercladur passà, curt suenter che las emprimas schluccadas dal lockdown èn entradas en vigur, per incumbensa da l'Uniun svizra d'assicuranzas. Var 1'400 respostas da persunas sur 18 onns ha l'institut nizzegià.
