Las medias online han remplazzà l’onn passà per l’emprima giada la televisiun sco gener da medias il pli pussant per furmar l’opiniun tenor il Monitur da medias Svizra 2021 che la Publicom ha fatg per incumbensa da l’Uffizi federal da communicaziun BAKOM.
Bleras marcas medialas regiunalas vegnian adina pli savens utilisadas online enstagl en furma stampada. Dentant er marcas cumplettamain online – sco per exempel il portal da novitads «Watson.ch» e las purschidas online da la SRG/SSR vegnian adina pli impurtantas per il process da furmar in’opiniun.
Las medias cun la pli grond'influenza sin l'opiniun tenor il Monitur da medias:
- Online 29%
- Televisiun 24%
- Radio 18%
- Social media 15%
- Medias stampadas 14%
Las medias socialas han surpassà il 2021 las medias stampadas, quellas èn ussa sin l'ultima plazza da l'influenza sin l'opiniun. Il studi annual ha tranter auter examinà la muntada da passa 170 marcas da medias e da 10 concerns.
