Montserrat Caballé era dapi duas emnas en l'ospital da Barcelona. Ella ha dentant gì dapi onns problems cun la sanadad. Suenter ina cupitgada avant sis onns ha la mamma da dus uffants strusch pli pudì ir ed era visada sin ina sutga da rodas. La ceremonia da commemoraziun vegn ad avair lieu la dumengia ed il funeral glindesdi.
Al public forsa betg uschè interessà vid l'opera, è Caballé probablamain surtut stada enconuschenta pervi da la chanzun Barcelona, ch'ella ha chantà ensemen cun Freddy Mercury da Queen, sco imni per ils gieus olimpics da stad dal 1992 en la chapitala Catalana.
4000 preschentaziuns suenter debut a Basilea
La diva ch'è naschida ils 12 d'avrigl 1933 a Barcelona, datiers da la chadaina da muntognas Montserrat, María de Montserrat Bibiana Concepción Caballé i Folch ha dapi dal cumenzament da sia carriera l'onn 1956 a Basilea gì dapi che 4'000 preschentaziuns. Ella vala sco davosa gronda diva da l'opera.
Caballé era dal 1959 fin 1962 engaschada a Bremen. Suenter pliras registraziuns ha ella gì adina dapli fans en Spagna, dentant era en Germania, Austria e la Svizra. Il success internaziunal ha ella cuntanschì l'onn 1965 en la rolla da Donizettis «Lucrezia Borgia» en la Carnegie Hall a New York.
RR novitads 10:00