Siglir tar il cuntegn

Header

video
La mort en il culm
Or da RTR dals 30.05.2016.
laschar ir. Durada: 4 minutas 22 Secundas.
cuntegn

Svizra Mort en la muntogna

Cun construir il nov tunnel da basa dal Gottard, in sistem da bischens d’ina lunghezza da 152 kilometers, han 9 lavurants pers lur vita. Quai èn 0,17 morts per kilometer tunnel.

Durant la construcziun da l’emprim tunnel da viafier dal Gottard en il 19avel tschientaner hai dà 199 morts. Quai èn 13.3 unfrendas per kilometer tunnel. Cun construir il tunnel da via dal Gottard avant bun 30 onns hai anc dà 19 morts u 1.2 morts per kilometer tunnel. E cun construir il nov tunnel da basa dal Gottard, in sistem da bischens d’ina lunghezza da 152 kilometers, han pers 9 lavurants lur vita. Da quai resulta ina rata da 0,17 morts per kilometer tunnel. Tut ils disgraziads eran da l‘exteriur, sco gia tar la construcziun dal tunnel da via dal Gottard.

La mort è preschenta dapertut

Pli baud vegniva mintgamai circa in terz dals disgraziads splattitschads da vaguns u locomotivas, mazzads da crappa u stgarpads da dinamit. Oz para la mort d’esser preschenta dapertut. «Oz datti da rar accidents nua ch’igl è propi privlus» concluda Jakob Lehner, l’incumbensà per la segirezza dal plazzal da construcziun a Sedrun. Privlus èn oz uschenumnads accidents da bagatella. «Merda en in egl, serrà en in det, sturschì in maun. Ma in tal schabetg po chaschunar in grev accident, quai è magari in pitschen pass! Ina casualitad!»

crap da fossa cun rosa e glisch eterna
Legenda: Per mintga unfrenda hai ad Erstfeld ina sort crap da fossa cun rosa e glisch eterna. RTR, I. Jäger

Tavla da commemoraziun ad Erstfeld

In di avant l'avertura uffiziala dal tunnel da basa dal Gottard han las famiglias ed ils anteriurs patruns da lavur sa regurdà dals 9 miniers ch'èn vegnids per la vita durant il temp da construcziun. Als portal nord ad Erstfeld è vegnida scuverta ina tavla da commemoraziun. Il vicari general per la Svizra originara, Martin Kopp ed il spiritual evangelic, Reinhard Eisner, han manà la celebraziun.

Artitgels legids il pli savens