Sch'in uffant mora suenter la naschientscha, lura en 60% dals cas entaifer las emprimas 24 uras, en 70% durant l'emprima emna, scriva l'Uffizi federal per statistica BFS. Quests mortoris vegnan quintads ensemen cun las naschientschas d'in uffant mort tar la mortalitad perinatala. Quella è dapi onns pli u main stabila ed è stada il 2020 tar 549 uffants u 6,4 quintà sin 1'000 naschientschas.
Dals uffants novnaschids han 313 u 3,6 promils betg survivì l'emprim onn. Il dumber è bain creschì cumpareglià cun l'onn avant (2019:283). Il medem mument è dentant sa reducì il dumber da naschientschas d'in uffant mort, sco gia dapi onns. Il 2020 hai dà 319, l'onn avant 344.
Pli paucs schumellins e trimellins
Sco gia l'onn avant è sa reducì il 2020 il dumber da natschientschas cun plirs uffants. 3,1% da tut ils novnaschids èn naschids sco schumellins, 0,07% sco trimellins. Il 2018 sajan anc 3,6% da tut ils novnaschids stads schumellins. Tar naschientschas da plirs uffants datti in pli grond privel ch'ils uffants neschan pli baud. Passa la mesadad (52%) sajan naschids avant il termin.
Total sajan 6,4% dals uffants naschids memia baud, pia avant la 37avla emna. Naschientschas prematuras tranter la 32avla e la 36avla emna sajan dentant idas enavos tar naschientschas cun plirs uffans sco er tar naschientschas cun in uffant. Il dumber da naschientschas extrem prematuras, tranter l'emna 22 e 31, saja detnant dapi l'onn 2007 stabil.
Il 2020 hai dà total 85'914 naschientschas vivas. Quai èn 258 pli pauc c'anc l'onn avant e prest 2'000 pli paucas che anc il 2018.