La razzia da questa bun'ura en la moschea An'Nur a Winterthur è succedida en il rom dad ina procedura penala. Quella aveva la procura publica da Winterthur/ Unterland avrì sin basa da tips concrets a la polizia cun la motivaziun «appel public a crim e violenza».
Entant èn quatter persunas en il focus da las autoritads - tranter quellas in imam etiopic.
Mazzar muslims che na vegnian betg ad urar a Winterthur
Durant ina pregia publica ils 21 dad october haja l' imam etiopic appellà da mazzar quels muslims, che refuseschian dad urar cuminaivlamain en la moschea. En pli haja el dumandà ils preschents da denunziar quels muslims. Tenor il Tagesanzeiger saja l'imam pir dapi pauc temp a Winterthur, ma dà en egl entras sias predias radicalas. El vivia en il bajetg industrial sin il lieu.
Tgenina rolla ch’ils ulteriurs trais inculpads hajan en connex cun la pregia na saja anc betg cler e vegnia intercurì, scriva la procura publica vinavant.
La moschea An'Nur era gia vegnida pli adura en nauscha glisch
Pir l'emna passada era vegnì enconuschent che la moschea ha probablamain da serrar la fin da l'onn. Ils locaturs na renoveschan pli il cuntrat da fittanza e l’uniun islamica na chatta pli locals novs. La moschea An’ Nur (arab per la glisch) aveva procurà pliras giadas per lingias grassas pervia dad ina radicalisaziun probabla da giuvenils.
RR novitads 07:00
