Moutier mida definitivamain en il chantun dal Giura
Il plaschair en las retschas dals pro-giurassiants era gronds. Era la regenza dal chantun Giura beneventa la decisiun. Per il chantun Berna pudess uschia ir a fin la «causa Giura», ina dispita sur plirs decennis. En la citad da Moutier han ils simpatisants festivà cun cortegis d'autos e bandieras. Ma era pleds da reconciliaziun èn vegnids ditg, uschia dovria quai uss l'unitad da l'entira citad ed er il respect er envers ils perdents.
La cussegliera federala Simonetta Sommaruga ha ditg ch’ils dus chantuns sajan sa cunvegnids da laschar votar ina vischnanca sur da star ni bandunar il chantun Berna mussia che la democrazia e la coexistenza funcziunian en Svizra.
Las duas regenzas dal chantun Berna e Giura ston ussa elavurar ensemen in proposta sco ch’ins vul far la surdada. Questa proposta ston lura ils abitants d'omadus chantuns acceptar. Ina votaziun naziunala e betg necessaria.
137 vuschs differenza
In resultat da 51.72% GEA a 48.28% NA para l'emprim mument pli clars che blers avessan spetgà. Dentant han tar 4’600 votants pussibels be gist ina differenza da 137 vuschs fatg la differenza. Igl è ina decisiun istorica en ina discussiun territoriala che cuzza gia dapi ils onns 50.
Bleras giadas han ils abitants ditg na al midament tar il Giura. Dentant gia il 2013, nua ch’ins aveva dumandà per ina midada per pliras vischnancas, avevan ils abitants da Moutier detg gea. Dentant era il resultat da tut las vischnancas in na. Questa giada èsi pia puspè in gea, era sche betg uschia clar sco il 2013. La midada po avair lieu.
RR novitads 18:00++