Siglir tar il cuntegn

Header

Demonstraziun dal clima cun in placat davant cun l'inscripziun: wo ist die Politik, wenn man sie braucht?
Legenda: Il moviment dal clima svizzer vul uss sez elavurar mesiras concretas per reducir las emissiuns da CO2. Keystone
cuntegn

Moviment dal clima svizzer Plan d'acziun per ina societad neutrala d'emissiuns

Tenor il moviment dal clima na mussa la politica svizra nagina voluntad da propi reducir las emissiuns da gas cun effect da serra. Ensemen cun la populaziun e scienziads vul il moviment uss sez elavurar in plan d'acziun cun mesiras concretas per reducir las emissiuns.

Il moviment dal clima svizzer sa senta anc adina laschà en la merda da la politica ed ha perquai cumenzà ad elavurar in agen plan d'acziun. En quel duai vegnir demussà, co ina societad neutrala d'emissiuns pudess guardar ora e tge mesiras ch'ins sto prender persuenter. Da vart da la politica na saja betg d'enconuscher ina voluntad – dad elavurar mesiras per reducir las emissiuns da gas cun effect da serra fin il 2030 sin netto null, scriva il moviment.

Er in onn suenter las chaumas per il clima n'haja la politica anc betg in plan per la soluziun da la crisa dal clima. Ella disdeschia da proteger la populaziun dal collaps ecologic che smanatschia, ha il moviment communitgà.

Project participativ

En gruppas da lavur tar mintgamai divers temas sco mobilitad, industria ed agronomia duajan vegnir elvavuradas mesiras concretas. Per ils activists èsi impurtant ch'il plan d'acziun è in project participativ che stat avert a l'entira populaziun. Els envidan perquai tut las persunas da sa participar a l'elavuraziun dal plan d'acziun.

Ina gruppa da lavur duai sa cumponer dad experts ed expertas, activists dal clima sco er pertutgads directamain. Ord il sectur da la scienza sajan gia 60 persunas sa decleradas prontas da sustegnair il project.

Ord l'archiv:

Video
Selina Arquint – ina activista grischuna per il clima
Or da Minisguard dals 09.11.2019.
laschar ir

RR novitads 11:00