Siglir tar il cuntegn

Svizra «Na» pervia da surpretensiun e malsegirtad

Ina gronda part da la populaziun saja stada surdumandada cun la votaziun davart la refurma da taglia sin interpresas trais. Quai resulta da l’analisa VOTO ch’è vegnida publitgada la gievgia.

Baluns cun parola cunter la refuma da taglia sin interpresas trais.
Legenda: Refusà la refurma da taglia d'interpresas pervia da malsegirtad. Keystone

Ils 12 da favrer ha la populaziun svizra refusà la refurma da taglia sin interpresas III. Malsegirtad e surpretensiun sajan stadas las raschuns principalas per quai «na», concluda l’analisa VOTO. Questa è vegnida fatga sin fundament d’enquistas da 1’512 persunas.

Trais quarts dals dumandads han inditgà ch’els hajan gì fadia da chapir il text da votaziun. Impressiunant è ch’era persunas bain furmadas, politicamain interessadas e persunas che voteschan tenor partida politica hajan declerà la malchapibilitad dal project sco raschun per refusar la refurma. Ils davos 18 onns saja quai mai stà uschè ferm il cas.

Mintga terz votant haja pervia da la cumplexitad da la materia vuschà tenor recumandaziuns. Ina gronda part dals adversaris ha numnà la posiziun dad Eveline Widmer-Schlumpf sco decisiv per l’atgna decisiun.

RR novitads 12:00