Ils primministers dals stadis federativs tudestgs èn sa cunvegnids il mardi – co las reglas da contact per tut las regiuns durant il temp da Nadal e Silvester pudessan vesair ora.
Davent dals 23 da december fin il 1. da schaner dastgan s'inscuntrar maximalmain 10 persunas, era persunas da differentas chasadas. Uffants sut 14 onns na duajan betg esser cumprais en quest contingent. Quai stat en in sboz dals stadis federativs ch'ins vul discutar la mesemna cun la chanceliera tudestga Angela Merkel.
Tudestgas e Tudestgs duain dentant star in pèr dis en quarantina, avant che far visitas da Nadal. Uschia vulan las autoritads minimar il privel d’infecziuns cun corona en connex cun las festivitads da Nadal.
Era Silvester in tema
Ils stadis federativs cusseglian en lur document a la populaziun da desister da laschar ir rachetas, in scumond da vender material pirotecnic n’è dentant betg previs. Las autoritads localas duain dentant dastgar scumandar da laschar ir rachetas en lieus cun blera glieud.
Il lockdown parzial che vala il mument en Germania duai valair enfin ils 20 da december. Tranter auter han serrà il mument museums, kinos, teaters ed ustarias. Sch’il dumber da novas infecziuns è dentant fitg bass, duain singulas regiuns tut tenor dastgar schluccar quest scumond.