Las Viafiers federalas vulan desister cumplettamain da l'erbicid glifosat fin l'onn 2025. Perquai examineschan ellas uss alternativas. La vegetaziun sin radund 7600 kilometers binaris stoppia adina puspè vegnir controllada e regulada, scrivan las Viafiers federalas. Uschia possia vegnir garantì il manaschi senza incaps.
Per cumbatter il zerclim dovran las viafiers per il mument l'erbicid glifosat. Cunquai che quel ha dentant consequenzas negativas per l'ambient veglian ins desister cumplettamain da quel fin l'onn 2025.
Cun aua chauda encunter zerclim
In'alternativa per cumbatter il zerclim duai esser aua chauda. Per in mez milliun francs han las viafiers federalas perquai laschà sviluppar in vehichel che squitta aua cun ina temperatura da 95 grads.
Dasper il vehichel vulan ins era examinar autras metodas. Sco per exempel materials da construcziun enturn ils binaris che duain evitar zerclim. Examinads vegnan però er erbicids da bio. Quels duain dentant be vegnir duvrads sch'i po vegnir cumprovà che quels n'han naginas consequenzas negativas per las auas.
RR novitads 12:00