Las audiziuns tar il Cussegl federal na paran betg da purtar fritga. Tant tar ils partenaris socials sco era tar las partidas na para da muventar nagut.
Partenaris socials betg da perina
Sindicats e la federaziun da lavurantas e lavurants èn vehementamain cunter la cunvegna da basa uschia sco quella è uss sin maisa. Quella prevesa in cumpromiss areguard las mesiras accumpagnantas tar la protecziun da pajas. Quai è in «no go» per travail.suisse. Els teman ch'i dettia uschia in dumping da pajas.
Auter la situaziun dal punct da vista da patrunas e patruns. Ina cunvegna garantescha tenor els l'access al martgà europeic ed ina segirezza da dretg. Però era els disturban las mesiras accumpagnantas. Sche la cunvegna duai persvader ina gronda part da la populaziun, stoppian vegnir fatgas adattaziuns en quest punct.
Anc betg dal tut sa posiziunada n'è l’Uniun svizra d'artisanadi e mastergn. Dentant din exponents che els sustegnan ina cunvegna da basa.
Nagin moviment – era betg tar partidas
Ils discurs han lieu davos portas serradas. Però tenor intervistas che represchentants da las partidas han dà suenter las audiziuns, èsi cler che vid la situaziun na sa mida per il mument nagut e ch'in cumpromiss è anc lunsch davent. Mintga partida haja anc ina giada intunà l’atgna posiziun. Per part era plazzà dumondas al Cussegl federal, che ston ussa vegnir respundidas. Però propi in pass vinavant n'èn las partidas betg vegnidas.
Ins po spetgar che partidas sco era ils partenaris socials insistan vinavant sin lur posiziun. Quai oravant tut durant la consultaziun. Ed avant ch'i vegn propi dir sin dir, na vegn quai era betg a dar moviment.
Quai che sto era vegnir resguardà è ch'igl è onn d’elecziuns e la cunvegna da basa vegn era instrumentalisada da las partidas per il cumbat electoral.
La decisiun...
...Duess crudar anc avant il prim da fanadur. Però propi datas uffizialas davart la decisiun dal Cussegl federal n'èn betg enconuschentas.
Ma tge ch’ins sa, è che partidas e partenaris socials han uss anc temp fin mez avrigl da prender posiziun. Fin là dura numnadamain la consultaziun. Suenter quella vul il Cussegl federal far in rapport che duai vegnir preschentà il matg.
RR actualitad 12:00
