Siglir tar il cuntegn

Header

Navigaziun

cuntegn

Svizra Nagin rumantsch a tut las dretgiras

Tgi che vul ir avant dretgira sto inoltrar ses plant en ina lingua uffiziala dal chantun. Il Cussegl federal na vul betg midar quai e refusa ina moziun dal cusseglier naziunal cristiandemocrat Martin Candinas.

L'entrada dal Tribunal chantunal a Cuira.
Legenda: Al Tribunal chantunal a Cuira pon ins inoltrar in plant per tudestg, talian e rumantsch grischun - dentant betg per franzos. Quai duai restar en la cumpetenza dal chantun di il Cussegl federal. Keystone

Candinas vuleva lubir da far plant en tut ils linguatgs uffizials da la Svizra. El aveva tranter auter argumentà che derschaders e procuraturs stoppian gia oz chapir autras linguas naziunalas perquai ch'il Tribunal federal publitgeschia sias sentenzias adina mo el linguatg original dal plant. Ultra da quai investeschia la Svizra uschè blers daners en l'enconuschientscha linguistica da ses abitants ch'ins dastgia senz'auter spetgar che mintgin chapeschia almain in auter linguatg uffizial.

Cumpetenza è tar ils chantuns

Il Cussegl federal na vul dentant savair nagut da quai. Per l'ina possia mintga chantun decider sez tge linguatgs ch'el vul acceptar avant dretgira. Per l'autra na fissan betg mo derschaders e procuraturs pertutgads da la midada, mabain tut las persunas involvidas en il process. La pussaivladad d’inoltrar in plant per tudestg, franzos, talian u rumantsch grischun pudess uschia esser da dischavantatg per partidas pli flaivlas. Sco proxim decida il Cussegl naziunal.

RR novitads 17:00