Il Cussegl dals chantuns ha refusà gievgia la proposta da la conferenza da mediaziun per il preventiv dal 2018. Cun questa decisiun vegnan investids ils 442 milliuns ch'eran vegnids liber pervi da la refurma da rentas, l'onn proxim per reducir ils debits.
La decisiun da la chombra pitschna è crudada cun 25 cunter 16 vuschs e duas abstenziuns. Na han ditg represchentants da la PLD, la PCD e singuls da la PPS.
Philipp Müller (PLD/AG) ha argumentà che la squitta da finanzas per l'AVS fissia stada ina mesira da placebo senza fundament legal. Auters pledaders han discurrì d'in exercizi d'urgenza fauss u d'in budget illegal.
Pli pauc per dumondas d'asil
La decisiun dal Cussegl naziunal è ussa nunnecessaria. Tar tuttas differenzas gudogna la summa la pli bassa che ha survegnì ina pluralitad en in dals cussegls. Quai munta che l'agid social per fugitivs survegn l'onn proxim 41 milliuns pli pauc, percunter la proposta dal Cussegl federal. Quai è en il senn dal Cussegl naziunal.
Medemamain na datti era nagins daners supplementars per la furmaziun pli auta. Il Cussegl naziunal ha vulì auzar la summa qua per 25,6 milliuns francs. Il Cussegl dals chantuns ha refusà quai.
Era giud maisa è cun quai ch'i dettia dapli persunal per las guardias da cunfin. Qua è il Cussegl dals chantuns sa mess tras che ha vulì desister da 30 plazzas dapli. Quest tema vegn dentant anc a fatschentar ils cussegliers pervi da differentas moziuns pendentas.
RR novitads 10:00